名古屋亞運｜蔡俊彥男花個人賽摘銀 決賽13:15僅負東道主飯村一輝
名古屋亞運劍擊項目周二（9月22日）喺愛知縣國際展示場上演男子花劍個人賽。港隊代表蔡俊彥一路殺入決賽，最終以13:15不敵東道主日本劍手飯村一輝，奪得銀牌，突破上屆杭州亞運銅牌嘅成績，創下個人亞運最佳戰績。
決賽戰情相當緊湊。蔡俊彥開局一度落後0:4，中段亦受對手壓制，比分曾被拉開至5:10。落後嘅佢隨後連追數分，先扳平12:12，更一度反超前13:12；可惜飯村一輝之後連取三分，蔡俊彥最終以13:15僅敗。
早前小組循環賽，被編入第二小組嘅蔡俊彥未受太大考驗，先後擊敗菲律賓、印尼、中華台北、阿聯酋同新加坡劍手，5戰全勝以小組首名出線；由於小組排名前列，佢喺32強輪空，直接晉級16強，之後一路過關殺入決賽。
賽後蔡俊彥接受傳媒訪問時形容心情「百感交集」：「有銀牌一定開心嘅，我目標拿金牌，唔開心最後輸少少。」佢分析敗因時認為，自己由落後到領先之後變得保守：「可能由4:8落後到13:12反超前，緊張關頭變得保守。我個問題係我沒有想法，處於一個被動的狀態。」佢亦大方讚揚對手飯村一輝處理得好、夠放膽。
蔡俊彥又透露，早前世錦賽後一度感到「崩潰」，甚至有過唔想打嘅念頭，但短暫休息後已經消失，「人總會有崩潰、失意的時候，最緊要係調整得返。」佢表示今次面對亞運嘅龐大壓力處理得唔錯，並多謝體院團隊特別係物理治療師同體能教練嘅幫助。佢強調「任務尚未完成」：「仲有團體賽，希望拿金牌彌補遺憾。」
講到32強止步嘅隊友張家朗，蔡俊彥立即力撐對方：「佢唔會拖累我哋，我100%相信佢嘅能力」，並指「我很驕傲同感恩有呢個隊友，整個運動員生涯跟他不斷互相扶持。」