名古屋亞運｜張家朗男花32強止步無緣衛冕 女重佘繕妡陳渭泠16強出局
名古屋亞運男子花劍個人賽周二（9月22日）舉行，爭取衛冕嘅港隊「劍神」張家朗喺32強以13:15不敵烏茲別克劍手Daniil Kravtsov，被淘汰出局，衛冕之路告終，呢個亦係佢三次出戰亞運男子花劍個人賽以嚟最差成績。
張家朗喺比賽初段受制於對手快速打法，比分多次平手，戰情到尾段出現變化，烏茲別克劍手多次搶攻得分，張家朗一度落後至12:14，雖然曾經追近至落後一分，但始終無法反勝。佢賽後接受電視台訪問時表示，賽前已盡力準備好今次比賽，但可能年紀大，加上有傷病，所以感覺自己跟不上，第一場比賽已覺得力不從心，但已盡力。據報道，佢坦言預料今屆將係自己最後一屆亞運，但目前最重要係周五（25日）嘅男子團體賽。
同日女子重劍個人賽，港隊兩名代表佘繕妡同陳渭泠亦雙雙喺16強止步，同樣不敵國家隊劍手。分組賽5戰全勝、以小組首名直入16強嘅佘繕妡，16強面對中國嘅楊靜雯，開局一度落後1:6，追至3:6時雙方發生碰撞，佘繕妡一度倒地需要接受治療，佢之後繼續比賽並將比分拉近，尾段追至13:14只落後一分，可惜最終以13:15落敗，連續兩屆亞運喺16強被淘汰。
另一名港將陳渭泠就喺16強面對中國嘅唐君瑤，以7:15落敗，無緣晉級。
今屆亞運劍擊賽事9月22日至27日舉行，共設花劍、重劍、佩劍男女子個人賽及團體賽12個項目。