名古屋亞運｜方凱申男子重劍個人賽首闖四強 鎖定生涯首面亞運個人獎牌
名古屋亞運劍擊項目周四（9月24日）上演男子重劍及女子佩劍個人賽。港隊重劍代表方凱申喺男子重劍個人賽8強，以13:12擊敗韓國劍手張孝敏，首次晉身亞運四強，由於賽事不設銅牌賽，佢已肯定為港隊鎖定一面獎牌，亦是佢四度出戰亞運以來首面個人賽獎牌。
現年33歲、世界排名第44嘅方凱申，8強一戰大部分時間落後比分，到尾段逐步追近，更一度反先12:11，其後被對手追成平手。兩人最終要以「決一劍」分勝負，方凱申贏得最後一劍，以13:12勝出晉級四強。
晉級路上，方凱申32強先以15:13擊敗卡塔爾劍手Youssef Abdeltawab，16強面對菲律賓嘅Noelito Jose Jr.，喺最後半秒一劍封喉，以14:13險勝過關，繼而喺8強再挫張孝敏。
另一名港隊重劍代表吳浩天，32強及16強先後擊敗新加坡及哈薩克劍手（16強以15:9勝KURBANOV Ruslan），惟8強以8:15不敵巴黎奧運男子重劍個人賽金牌得主、日本劍手加納虹輝，無緣四強。
女子佩劍個人賽方面，港隊代表薛雅齊喺8強以13:15僅負年僅17歲嘅中國劍手潘其妙，無緣準決賽；另一港將梁洛文則於16強止步。